सुमत के सूत
सुमत के सूत मा जुड़े रहव भारत के नर नारी
सहीं बात ला जानलव मन मा करव बिचारी
देखव हमर देश के
इतिहास ला रे भाई
परदेस के मनखे आके
कतक देवेहें करलाई
परलोखिया मन के खातिर
देश हमर बंटागे
हिन्दू अऊ मुसलमान मा परगे दरारी
सहीं बात ला जानलव-------------
फेर रावण कस गोरा मन के
मरे के दिन आगे
बानर भालू के कड़कड़ावत सेना
उनकर लंका के पता पागे
राम बनगिन राम के धरती के बेटा
अंगरेज़ मन ला निकालय दे मारी- दे मारी
सहीं बात ला जानलव-------------
छुआछूत अऊ भेदभाव ला
देश अऊ हिरदे ले निकालो
भाईचारा के सुग्घर दिया मा
सुमत के जोत ला बारव
मया दया हमर देश के गहना
इही हे हमर चिन्हारी
सहीं बात ला जानलव-------------
© छेदूराम चन्द्रवंशी
No comments:
Post a Comment